يقطع الجواز ع اللى عايز يتجوز

هو أساسا صنف عايز الحرق
يجيب الجنان
ومايجيش غير بالدق على دماغه
كل ما الواحد يقول خليك متحضر
سيبك من موروثات المجتمع المنيل ده
تطمع هى
تديها صباعك
عايزة تاكل دراعك
لأ يعنى آه
آه يعنى لأ
عايزة ومش عايزة فى نفس الوقت
وحوارات ورغى على الفاضى
وكله كوم
وحوار الفراغ ده كوم تانى
واحدة فاضية
بتخلص شغلها وبعد كده مش عايزة تقعد لوحدها
لازم حد يسليها
ويتكلم معاها
ويرغى
عشان ياااااااا حرام البنت مش لاقية حاجة مفيدة تعملها
ماهى لا بتدفع فاتورة تليفون
ولا مرزية فى شغلانتين عشان يادوب تعرف تجهز المطرح اللى هتتنيل فيه
ويقولك الخطوبة دى أجمل فترة
بلا جواز بلا هم
ماله الانحراف
تعمل اللى انت عايزه
من غير الوجه الآخر للعملة
لا رغى وهم
ولا نكد وغم
وديتها كارت ب 25 جنيه
مهو انا اللى فقرى

خد حسنات

قال رجل من السلف
سبحان الله عدد ما كان وما سيكون وعدد الحركات والسكون
ثم قالها بهد عام فقالت الملائكة اننا لم ننته من كتابة حسنات المرة السابقة

بالذمة ده كلام ناس عاقلة
فى أى كائن عنده ذرة من عقل يصدق الهسس ده
يعنى مبدئيا مين الشخص اللى من السلف ده
ومين اللى حكى عنه
ومين اللى سمع الملايكة وهى بتتكلم
ثم بقالهم سنة بيعدوا ليه
هم بيعدوا بطريقة الأرقام الرومانى مثلا
وبعدين يعنى سؤال
هو الواحد مش المفروض بعد الصلاة بيسبح
ينفع بدل ما أكرر التسبيح... أقول "سبحان الله 33 مرة".. ينفع
مهو نفس المبدأ
افتكاسات بقى للأعداد
وشغل العداد وعد الحسنات
أصلا ازاى الواحد يعامل مع ربنا تعامل التجار ده
وايه العملة الثابتة دى
إماطة الأذى ليها حسنة
والتسبيح حسنة
ده حتى التسبيح أكسب
لأن الحسنات بالحروف
تدين سلبى
يضر المجتمع مش يفيده
تلاقى الشخص من دول نطع
فالح بس يبعت ايميلات من اللى ب 3 مليون حسنة
قال وفرحانين قوى وبتقولوا فى صحوة ايمانبة
جتكوا البلاوى

أحاسيس غريبة

بقالى كتير قوى مكتبتش
لكن مش عشان معنديش حاجة أقولها
كتير قوى بيبقى جوايا كلام
حوارات وآراء
أحاسيس ورغبات
وبفضل ساكت
هل هو خوف
زهق
كسل
الله أعلم
لكنى على سبيل التغيير قررت أكتب دلوقتى
والغريب, انى فى هذه اللحظة
معنديش أى كلام أقوله